شعر، يوخو ايله آييقليق سينيرلاريندا دوْغور، خيالدان[1]. قاينار باخيشلي، قاراپاپاقلي يوْلچولار اوتورارکن، قاتار آياقيالين يوْل گئدير، شعر دوْغولور. قوراللار [قايدالار] گئري چکيلير؛ گلهنکلر چؤکور؛ زهرلي آجيلا ايضطيرابلي اؤزگورلوک، شاعير بئينينده قالخير آياغا. «باريش! جانينداكي زهرلي دردله! اييرهنمه اؤزوٍندن ايلان بالاسي. بلكه ده ان آجي حقيقت، ائله سنسن يئر اوٍزونده». شاعير اؤزوٍ دئميرمي بوردا «ايلان بالاسي» شعر و شاعير حاققيندادير. بو، يازي قالاباليغيندا دوٍشونجه شلالهسيدير، يوخسا متنين محبسينده سسلر دجللييي؟ هرنهديسه، من راميز رؤوشن'ين ايلان بالاسيني آييقليقدا گؤروٍرم، سيلويا پلات'ين سؤيلهديکلريني ايسه يوخولاريمدا: آخار توٍستوسونو قوْيوب گئتميش کؤهنه قاتار، باخيشلاريميزي قزيللي دؤشوٍندن يايينديران دالغين بايقوش، موم هئيکللرينين چيينينده توٍلکو دريسي، شهر بوغارسيقلاريني چئينهين سيچان ديشلري، و قاپالي فاجيعهنين آغير سوسقونلوغو، اينتحار. پلات اوْتوز بير ياشيندا اؤزوٍنو اؤلدوٍرمهديمي؟ شعر، اوْرماني بوراخيب، تهلوکهلي ماشين يوْلونا چيخميش کيرپينين اينتحاريدير. بو، "وارليغين دؤزوٍلمز يوٍنگوللويو" دئييلمي؟
شعر؛ تهلوکهلي يوللارا چيخان کيرپي
دئريدانين ديلي ايله دئييرم، شعر کيرپيدير. اوْرمانلادا، ياريقارانليق آلانلاردا ياشايان، نفس آلان، اوزاقلارا يولچولوغو اساس سايان کيرپي. ماشين يولونا چيخاراق اؤزونو تهلوکهيه آتان کيرپي. ايچينه قاپانان، ايچه قاپانديغيندا ايسه تهلوکهيه آچيق اولان قيسا، ياريم يووارلاق شعر کيرپيسي.
دئريداني تورکجهيه قازانديرانلارين بيري احمد ساري دئيير: شعر ماشين يولونا چيخار چيخماز اؤلن بير شئيدير. ديله گلر گلمز اؤلومله اوٍزلشمک مجبوريتينده قالان بير شئي. بو دوغرودور. شاعيرلر کيرپيلرينين اؤلوموندن قورخمازلار. يالنيز تهلوکهيه، ماشين يولونا شعر گؤندرمک اوچون شعرلريني اولوشدورارلار. بو آرتيق غريزي حالا گلميشدير. شعر يازيب کيرپي تؤرهدن هر کس، بو شعري (کيرپيني) کيمسهيه گؤسترمک ايستهيهجک، اوبيريلريله پايلاشديرماق، تهلوکهيه آچيق ساخلاماق مجبوريتينده قالاجاق. تيمساح بالالارينين ـدوغولار دوغولمازـ اوٍزونو دنيزه چئويرهر، دنيزه دوغرو آدديم آتسينلار دئيه. شاعيرين شعري ده بئلهدير. شاعير شعر يازار، شعر ايسه اؤزونده ماشين يولونا چيخما، تهلوکه ايله قارشيلاشما گوٍدوسونو بارينديرار. يولدا اؤلر يا دا اؤلمز. کيرپي بو آپورئتيک باغليليغي جانيندا گزديرير.
شعر ضديتده ياشامالي، هم قاپالي، هم ده آچيق اولماليدير. شعر يوزوملارا آچيليرکن، ياراتديغي حقيقتي قاپالي ساخلايير. اؤلن شعر يوزومسوز سؤزجوکلرله قوراشديريلمش ميصراعلاردير. سؤزلر اوخوندوقدان سونرا اؤلور، داشيديقلاري آنلاملار اونلارين يئريني آلير.
قایناق: چاپا حاضیرلانمیش
"آنجاق شعر؛ بيرآز دا سئوگي، دوشونجه و سياست" باشلیقلی کیتابدان
[1] ادبياتدا باشليجا ائلئمئنت [عنصر] خيالدير. اساسن خيال گوجونون [تخيل، imaginatiom] ياراتديغي سئچکين اثره بديعي ادبيات دئييلير. لاکين بو يئترلي دئييل، اثرين گئرچک عالمله آنلاملي ايلگيسي اولماليدير.
