مومییالانمیش آدام
ایواز طاها
شهريار زاماني خيالي بير كندين، داخماسيندا توتوب ساخلاماغا جان آتير؛ داها دوْغروسو ايندي اوشاقليق چاغينين گؤزلرييله باخديغي بير كندين داخماسيندا. و آيي، گئجهني، داغي، مئشهني، شاعيري و مَلكلري بيله، گئرچكلييه اويغون شكيلده دئييل، اؤز نوْستالژي دوٍنياسي اؤلچوٍسونده يئنيدن يارادير. او بیر زامان شاعیرانه خلسهدن آییلیر کی، بوتون دونیا دییشمیدی. ایقتصادي چيچکلنمه دالغاسي صفالي كندي چيركلنديرمیش، پالچيقدان تيكيلميش ديوارلارين يوموشاقليغيني، سئمئنتين سَرتلييي ايله عوض ائتمیشدیر. دئمك، «انسانلا چئوره» آراسيندا ائله بير ديوار تيكیلميشدی كي، اوْندان قوْيوب قاچماقدان اؤزگه چاره قالمامیشدی. بو دَييشيلميش دوٍنيا، داها شاعير روحونون دينج يوواسي اوْلا بيلمزدی، اوْنا گؤره ده اوْ، ييغيشيب اؤز تانيش كئچميش يوردونا سفر ائدير.
لاكين شاعيرين گوٍمان ائتدييي كيمي گئرييه يوْل وارمي؟! شاعير اوُزون سوٍره آيريليقدان سونرا يئنيدن كئچميش زامانا و مكانا قاييدير. آمما بو دؤنه اوْ، تانيديغي آداملارين دوٍنيادان كؤچوٍب گئتديييني گؤروٍر. اوْنون گؤرمک ايستهدييي دوٍزهنليكده دييشيلمهميش بير كرپيج بيله قالماييب:
هله ده گؤزومو اوْووشدورورام،
ائله بيل عصرلرين يوخوسوندان دورموشام
ايتيريب اسکي دوٍنياني منيم حياتيم
عهديمي تزهلهيه بير كرپيج ده قالماييب.
يوخو نئجه قوْرخونج بير كابوسدور، اوْياقليق دا!
تانيشلار گئديبلر.
سئويملي بير دوٍنيانين داغي!
واي قوْرخورام!
اينديكي زاماندا اؤزوٍنو مومييالانميش آدام سانان شاعير، سانکي مزاردان قالخميش اؤلوٍدور. اوُزون سوٍره خلوته چکيلمکدن سوْنرا يازيلميش «موميالانميش آدام» شعري، شهريارين احوالروحيهسينده باش وئرهن درين دييشيكليكدن خبر وئرير: مومييالانميش آدام چوخورا دوٍشموش گؤزلريله سوْيوق و سايماز چؤهرهلر آراسيندا يوْل گئدير. آنجاق ايلكين خاطيرهلريله خاریجي گئرچليك آراسيندا هئچ بير ياخينليق قالماديغي اوٍچون اوْ، سرگردان حالدا يوْلونو آزير. حتتا اوْنو تانييانلار دا لاپ كؤلگهلر تك اوْيانبوياندان كئچيپ گئديرلر، اوْنلارين يالنيز آياق ايزلري قالير. شهريار يازير:
«كوهنه تانيشلارين، خيال سوٍرعتي ايله ائولردن چيخيب ديوارلاري آشان و مندن اؤزلريني گيزلهدن كؤلگهلريني دويورام. دئيهسن، پيچيلداشيرلار، لاكين اوْنلارين سسي منه چاتينجا، بوٍتونلوکله باتير، بلكه ده دئييرلر: جاني نئجه ده بَركيميش كي، هله ده ساغدير. آمما نه بيلمك اوْلار، بلكه اونلار دا منيم كيمي قبيردن قالخيبلار، آنجاق داها جاماعتين اوٍزونه باخا بيلميرلر.»
مومييالانميش آدام، اؤز مزارينا قاييتمازدان اؤنجه، نه قدهر چاليشسا دا بو يئني دوٍنياني قاورايا بيلمير. اوْ، نه قاباغينا چيخان قارانليق چايخانين، نه ده آرخين قيراغيندا بوْينونو بوٍكوب فيكره دالميش سالخيم سؤيوٍدون سيرريني آنلايا بيلمير. سوْندا، اوْنون چاشقينليغي دوٍنيانين وفاسيزليغي و آلچاقليغي بارهده فيكيرلره قاريشير. شهريارين اؤز آلينيازيسينا لاغلاغالي و غملي باخيشي بوردان باشلانير:
من اؤلموٍشديم نئچه ايللر بوْيو سن ساغ ايدين آمما
اؤزوم ده قالميشام حئيران، اؤلن ديرچَلدي، ساغ اؤلدوٍ
"شهریار تیسگیلی و نوستالگییانین تحلیلی" کیتابیندان ایختیصارلا آلینمیشدی. بو کیتاب گلهجکده ایشیق اوزو گؤرهجکدیر.
