بعضي شاعيرلرين الينده گولونج بير بهانه وار: رولان بارت قارماقاريشيق يازيردي، فرانسادا مالارمه چاپ حرفلريله اويناييردي، تورکيهده ائجه آيهان ديلي پوزوردو، بيز نييه پوزماياق.
بو بهانهلره جيددي ياناشماق گرهک دئييل، بو بهانهلره آنجاق تنبل و ديلبيلمز شاعيرلر سيغينيرلار. لاکين بو خستهلييين گئنيش ياييلديغيندان اونو اؤزوموزده درمان ائتمهليييک. بيليرم چوخلاري بو يارايا دوز باغلاييرلار. تورکيه شعرينين «ايکينجي يئني» آخيمينا باغلي ائجه آيهانين آدي گلميشکن گلين بو پروبئلمي اونلارين شعري ايشيق آراشديراق. بيليريک اؤتن يوزايللييين قيرخينجي ايللرينين تورکيهسينده اورهان ولي باشدا اولماقلا «غريب» آخيمي ياراندي. بونلارا «بيرينجي يئني» ده دئييليردي. بونلار هر يئرده گؤرونن ساده شئيلري آنلاديرديلار. مطلق قاوراملاري يانا ووراراق چؤرهک درديندن يازيرديلار، ياشاماق سئويجيندن، طبيعتله باريشماقدان، اؤلومدن و سئوگيدن. غريبچيلر هر تورلو قايدايا، اؤلچويه، قافيهيه، شاعيرانهلييه و طنطنهلي ديله قارشي چيخيرديلار. سوسلو ديلي بوراخاراق دانيشيق ديليني قوللانيرديلار. بونو هم اورهان ولي قانيق ائديردي، هم اوکتاي ريفات خوروزچو (1914-1988)، هم ده مليح جئودت آنداي (1915- ). رومانتيک چئورهلردن سييريلميش بو شاعيرلرده اوشاقليق عالمينين ديل پوزونتوسونو گؤرموروک، حالبوکي بيزيمکيلرين بعضيسي پوزغون [فاحيشه] ديلي سئويرلر. چونکو پوزغون ديلي اؤيرنمک آلينتري ايستهمير، بو ديل پلتک دانيشيقلاردان اوْلوشور. تورکيه شعرينده «ايکينجي يئني» آديلا تانينان آخيم، بيرينجيلردن داها اوزاقلارا گئده بيلدي. اونلار ديلين اؤزولونده دايانان قورولوشو بالتالايا بيلرديلر، بالتامالاديلار. جمال ثريا و سئزايي قاراقوچون ديلله اوغراشمالاري آنادولو تورکجهسيني داغيتمادي، اونا يئني چالار، يئني گؤزهلليک گتيردي. اؤتن يوزايللييين ايکينجي ياريسيندان باشلايان ايکينجي يئني آخيمي، گئريييه قاييتدي، سوررئاليزم قايناغينا. بونا گؤره دئييرم اونلار ديلين اؤزولونده دايانان قورولوشو بالتالايا بيلرديلر، بالتامالاديلار، چونکو سؤزجوکلر آراسينداکي آنلام باغلاريني دارماداغين ائدهرک يئني گؤرونتورلر ياراتماق ايستهييرديلر. اونلار شعرده آنلامي اونودور، سسي اؤنمسهييرديلر. اونلار دئميرديلر آنلام آديندا بير شئي يوخدور، اونون تصادوفي باش قالديرديغيني وورغولاييرديلار. بونا گؤره ده ايکينجي يئنيچيلرين شعرلرينين چوخو قيريققيريقدير. تصادوفن سئچيلميش سؤزجوکلر و جوملهلرين آلتآلتا سيرالانماسيلا شعري اولوشدورورلار. بئله اولدوقدا جومله قورولوشو پوزولور، آمما ديل پوزولمور، ديلين قارشيسيندا يئني دوزهنليکلر آچيلير. ايکينجي يئنيچيلرين اؤندهري جمال ثريا، و خاچآتاسي ائجه آيهاني دئميرم، سئزايي قاراقوچا اؤتهري باخيشدا ديلين حيرتآميز گوجونو و يوموشاقليغيني گؤروروک. دوغرودور، بونلارين ضعيف داماري رومانتيزمدير، آمما ديل باجاسيندان باخاندا، بوردا شعر اؤز تاريخي ايشلهييني يئرينه يئتيرميشدي، ديلي اوچوروب يئنيدن قورموشدو. اورهان ولينين اوچوروب داغيتديغي قافيهيه سئزايي قاراقوچ قاييتميشسا دا، يئني بيچيمده قاييتميشدي.
دؤنهدؤنه وورغولاماق ايستهييرم کي، تکجه ديلي يئنيدن قورماغي باجاران شاعير ديلي اوچورماليدير، يوخسا اؤزو ده ديل اوچقونونون آلتيندا قالاجاق.
