بو سیاست قینانمالیدیر
سایین طاهانین یازیسیندا آجی گئرچکلیکله بیرلیکده، منیم دویدوغومجا ایچهریده ایرانین رسمیلرینین "عایلهوی دالاشما" آدلاندیردیغی سیاسال چکیشمهلرین ده قاباریق ایزلری واردیر.
چین دؤولتینین اویغورلارا قارشی ایشلتدییی گوج، اؤلدورمه، یارالاما، یاخالاما آکتلاری چین خالقینین اینسانلیق آدینا باغیشلادیغی بؤیوک باشاریلاری کؤلگهلییر.چین خالقینین قازاندیغی یوکسک کولتوره چیرکین و آشاغیلاییجی ایزلر بوراخیر. بو دؤولت اوجا چین خالقینین آدینی باتیرماغا دوغرو گئدیر. اؤزونون روس تایلارییلا بیرلیکده ایراندا کئچیریلن گولونج پرئزیدئنت سئچگیلرینی رسمیته تانییان ایکینجی آلچاق سیاستلی دؤولت اولان چین، اویغورلاری تکلهمیشدیر. تورک دونیاسیندا تورک اولاراق بیرلشمیش بیر گوج اولمادیغی کیمی موسلمان اؤلکهلرده ده بیرلشمیش موسلمان بیر گوج یوخدور.
اویغورلارا قارشی آپاریلان بو موردار سیاست، بو قان، قینانمالیدیر. اینسانلارین میللیتینه گؤره اؤلدورولمهسی اینسانلیق تاریخینین ان چیرکین آغلاری اولاراق قالاجاقدیر. بو جینایتلر چین خالقینا اوتانج اولاراق اینسانلیغین بللهیینده قالاجاقدیر.
بوتون بونلارلا بیرلیکده ایران دؤولتینین سیاستلرینی قینایان ایواز بَیه قیسا بیر سؤز دئمهسم اولماز.
سایین ایواز بی، یازدیغینیز بو مکتوب اوچون چوخ ساغ اولون. سیزین ایراندا یاشادیغینیزی دا گؤز اؤنونه آلارساق بیز ائشیکده یاشایانلاردان قات قات جسارتلی بیریسینیز. ایران کیمی بیر اؤلکهده تورک آدینا سؤز دانیشماق یئنی اولای، یئنی حادثهدیر. سیز بونو باشارمیسینیز. ایجازه وئرین گونوموزون چین اؤلکهسینده اویغولارین اؤزرک اولدوغونو دا بیلدیریم. چین بویدا بیر اؤلکهنین رسمی پولونون اوستونده یالنیز ایکی دیلده یازی گئدیر: 1- چین دیلی. 2- اویغور دیلی. یاشانان آجیلارا باخمایاراق، بیز آذربایجانلیلارین ایراندا اولان دورومو، اویغورلاردان هئچ ده یاخشی دئییل. اویغورون دوردوغو یئره چاتماق اوچون بیزلر هله هله اوزون بیر یول کئچمهلیییک. بیزیم یاشادیغیمیز بو اؤلکهنین رسمی پولونون اوستونده فارس شووینیسمینین ایزلری گئدیرکن، چین پولونون اوستونده اویغورون یازیسی گئدیر. اویغورون اؤلومه قاتلاشماسینین ندنی، دیلینین رسمی اولماسی اوچون دئییل، موستقیل اویغور دؤولتی اوچوندور. سیز سایین ایواز بی، ایران دؤولتینین سیاستلرینی تنقید ائدرکن "بوگونکو دؤولت" تئرمینینی ایشلتمکله، بو حاکیمیتین قاباقکی دؤولتلرینی قوروماغا یؤنلیرسینیز. بونونسا سیز ایواز طاها اولاراق یالان اولدوغونو کسین بیلیرسینیز. یئنی سیاست گؤتورن سیاستچینین جدییه آلینماسینا یالنیز بیر یول وار :
اؤز کئچمیشیله حئسابلاشماق.
اوغورلار اولسون
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
باشلیق سایت یؤنتمنیندندیر
